ضفاف
إنتي مهما تغيبي عني أصلو ما بتفوتي مني
عايشة فيا وساكنة جواي في خواطري وفي مشاعري
وفي تسابيحي وغناي
زي فرح ما ليهو آخر شوق سنين لزول مسافر
راجي الزمن في يوم يجيبو لديارو ولحبيبو
والفريق يفرح يغني
إنتي مهما تغيبي عني أصلو ما بتفوتي مني
في عيونك شايلة أكوان من وداعة ومن أصالة
ومن براءة ومن محنة عزة تشرب من معزة
ومن تراثنا ومن أصلنا
وعد غرقان في نداهو زحمة أطفال جوة جنة
وزول بيحلم بالعديلة وفرحة الريد الطويلة
ناس تجيهو تغني ليهو وناس تبارك وناس تهنئ
أنتي مهما تغيبي عني أصلو ما بتفوتي مني
وتبقي يا حلم الأماسي شمعة ضاوية في كل دار
وزهرة في كل المواسم كل يوم بتزيد نضار
وقمة لبنوت بلدنا وفرحة لعيون الصغار
ولوحة عن حسنك بتحكي فيها هزة وفيها نقزة
وفيها نوبة وفيها طار
تهفو ليك الأمنيات وتزهو بيك الأمسيات
وبيك تفرح وليك تغني
أنتي مهما تغيبي عني أصلو ما بتفوتي مني
تعليقات
إرسال تعليق