هل بتصدق .....
هل بتصدق إني رسمتك
وما أستخدمت اللون والريشه
وبس في الخاطر أنا شكلتك
... شجرة حنه.. وزير.. وعريشه
وإني لقيت جواك جواهر..
من إحساس وكنوز مافيشه
وعشت في قربك أجمل دنيا..
في الأحلام بتمنى أعيشه
هل بتصدق إني عشقتك من إشعاع النظرة الأولى
وشفتك بهجه وعالم تاني.. فيهو مواهب مامعقوله
وليك صرحت وبحت بكلمه كنت بخاف أضطر أقولا
وشلت حصاد اللحظه الصعبه وملت عليك بكل سهوله
هل بتصدق إنك طبي.. ومكمن حبي.. وكل آمالي
وإنك زول متواضع وطيب وفوق الطيبه خرافي خيالي
وإنو خيالك وشوش نسمه ونقرش باب القلب الخالي
ولم فتحت الضلفه أعاين... إنت دخلت علي طوالي
هل بتصدق لمن إنت وصلت مداي أنا كنت وصلتك
وإنو في نفس اللحظه الفيها دخلت علي أنا زاتي دخلتك
ولمن فاض النيل جواي قطعت حديث النيل وسألتك
عن معناك وطلعتك نجمه فاتت حد الريد ونزلتك
هل بتصدق إنك طاير بين أغصان الدهشه محلق
وإنك زهره وديعه.. بديعه.. كل مايوم في الروح بتفتق
وإنك غيمه ظليله.. حميمه ..في الأعماق بتصب وتدفق
وإني معاك أنا أسعد كائن... أنا حلفتك.. إلا تصدق
تعليقات
إرسال تعليق