زمن الغناوى الشايلة من ريحة الذعاش

أريتو عاش
زمن الغناوي الشايله
من ريحة الدعاش
وين يا زمن..؟
سايبنا في نص الطريق
خليتنا في عز الحريق
فايتنا ماش،،،
أرواحنا ساقيها الصبر
والعمر ليلاتو بتمر
وقلوبنا يا زمن الفرح
حزنانه ماليها ارتعاش
سيب بي وراك حبة عشم
بلسم جراح
أو وصفه بتداوي الألم
أو خدره في الزمن الغباش
يعني ماش..؟
وينن وعودك لينا
ما قلت ساكن فينا
ولا الزمن غشاش
قمرك رحل بدري
ضلم ليالينا
في روحنا لو تدري
إنك تعود لينا
ريده وحنان جياش
نوراًَ يضوي الليل
في الضلمه يهدينا
ويحوم عليهو فراش
يا ريتنا لو نحلم
تبقى الفيافي عشم
أصلو الحلم عايش
والدنيا لو نصبر
رغم الهوان والمر
نلقاها بتخدر
والفرحه بتجينا
في قلوبنا تبني اعشاش